Como ficiéremos hai un añu, Fai! acudió a la movilización entamada por XEGA pal 28 de xunu. Nesta data remémbrense los fechos d'hai 40 años cuando nel pub Stonewall de Nueva York la policía fexo una más de les avezaes redaes d'acosu al coleutivu que retrucó a la represión con una revuelta en llucha pola llibertá sexual qu'inda sigui anguaño.

Fai! entiende que la llucha pol reconocimientu de la llibertá afectivo-sexual ye prioritaria pa construyir una sociedá realmente llibre y nueva na que nun heba nengún tipu de torga nin discriminación y pa ello fáise precisu'l sofitu activu al movimientu LGTB y la implicación na so llucha que tamién ye la nuesa.

Nesti sen, la situación pal coleutivu tien lluces y solombres:

Per un llau l'aprobación del matrimoniu homosexual foi una midida importantísima y un gran avance, pero queda agora, como siempre que se consigue algamar un derechu pela vía llegal, l'asegurar el so cumplimientu y, sobremanera, la posterior normalización y visibilización de les estremaes opciones sexuales y afectives, sobremanera nos casos de los coleutivos de tresexuales, bisexuales y tamién de llesbianes.

Ente les solombres, tenemos les avezaes: discriminación, ridiculización, fobies...que siguen apaeciendo en munchos nichos sociales y nes que la escuela y los medios de comunicación tienen muncho que dicir.

Aisllar esos focos d'homofobia, que sigui agospiada, por supuesto, na derecha "lliberal y católica", al tiempu qu'inda ta presente en partíos y organizaciones que s'autodenomen "progresistes" o "socialistes" ye prioridá anguaño pa dir valtando prexuicios qu'aseguren un futuru a curtiu plazu de non discriminación y plenos drechos.

Pa finar, dende Fai! queremos dar la norabona a Xente Gai Astur y al restu de les entidaes organizadores del día del Arguyu en Madrid por dar otru pasu bien valiente al nun convidar a la participación d'instituciones como l'Ayuntamientu de Tel Aviv, que nun conderguen la masacre xenocida en Palestina del sionismu israelí.

D'esta manera, facemos llegar a les compañeres y compañeros de XEGA, como organización de defensa unitaria del coleutivu LGTB asturianu, el nuesu sofitu y aplausu rotundu tamién na so postura de nun comulgar nin collaborar cola "Comunidad Judía de Asturias" que tampoco nun conderga l'esterminiu palestín.

¡POR UNA ASTURIES LLIBRE DE FOBIES Y DE PREXUICIOS!

¡ARGUYOSES Y ARGUYOSOS DE LO QUE SOMOS!

¡PUXA'L 28 DE XUNU! ¡PUXA LA LLIBERTÁ SEXUAL Y AFECTIVA!

N'Asturies a 30 de xunu de 2010