Con motivu de la celebración del 25 de mayu, y en virtú de la necesidá de reivindicar los fechos de 1808 como día d'Asturies, y en cuenta de cellebrar l'avezáu día de "la Santina", dende la organización d'esquierda soberanista Fai!, esti añu vuelve a entamase, con tola ilusión, un actu de folixa y reivindicación "pa qu'aquel llevantamientu popular encabezáu por dos muyeres nun quede nel escaezu", sigún comentaron dos militantes de Fai! esta mañana en rueda de prensa.

Dende Fai! quixo convidase a qu'ellí s'espresen les organizaciones del texíu social y políticu de la redolada ideolóxica de la esquierda soberanista. Al tiempu, demientres trescurra l'actu políticu nel conciertu, el micrófonu del escenariu tará abiertu a la llibre espresión de cualquier persona qu'en nome de cualquier coleutivu quiera falar sobre la temática de la folixa o sobre la so actividá o'l so proyeutu políticu, al tiempu que pa esparder otres convocatories...etc.

La voluntá final de Fai! ye la de recuperar la dignidá d'esti día, que foi históricamente cellebráu como día d'Asturies enantes de la "transición", y pa ello algamar la máxima representatividá nel actu d'organizaciones del entornu social y políticu asturianu, lo que dende Fai! sedría "un llogru considerable na situación de total indefensión na que s'atopen munches de les reivindicaciones que compartimos na actualidá toes y toos".

El conciertu, qu'entamará a les 20 hores del sábadu 22 de mayu na Casa Sindical de Xixón, va cuntar coles actuaciones de:

- Mallacán, grupu cimeru de rock d'Aragón y n'aragonés, una llingua minorizada como l'asturianu, que vien per PRIMER VEGADA A ASTURIES y dempués de participar nos principales festivales de rock del estáu, asina como de tener esti añu una xira en Xapón nel perimportante Fuji Rock. El so estilu, dempués de 5 discos, siendo l'últimu "Mar de Suenios" (2009) mezcla'l ska col rock y les gaites aragoneses pa facer del escenariu un espaciu contestatariu dende'l que llanzar un mensaxe subversivu de Zaragoza y el País Aragonés al mundu.

Ver:

www.myspace.com/mallacan

- La Tarrancha, grupu de ska-reggae asturianu que vien d'asoleyar el discu "Ö33" dempués de les grandes esperiencies de "ExitENCIA" y "QLT!" con un soníu folixeru perprestosu, mestizu, combativu y cola potencia que-yos da nel escenariu el puxu de los vientos-metal y el curdión, xunto con una gran presencia de músicos de munchu valir. Un auténticu espectáculu'l d'esti grupazu asturianu que vien de tocar nel RudeGaita xunto coles bandes de renomáu prestixu Betagarri y Talco.

Ver:

www.myspace.com/latarrancha

- Arma X, reconocíu raperu asturianu de La Cuenca (Ex. Stoned Atmosphere, Premiu AMAS), acabante d'asoleyar en solitario "25 Otoños", un discu de hip-hop d'estilu hardcore, con una fuerte influencia rock-country nes bases musicales y con lletres directes y mui ideoloxizaes. Cunta cola collaboración de músicos del altor d'Igor Paskual o Xel Pereda na grabación d'un discu que nun dexa indiferente a la crítica col que consigue enganchar a muncha xentenon vinculada al xéneru. Un artista comprometíu que sabe garrar el glayíu d'insumisión que surde de lo más fondero de les mines de carbón d'Asturies.

Ver:

www.myspace.com/25armax

- Galán, otru raperu asturianu, natural de Tresona, Corvera. Apocayá espublizaba'l discu nuevu "Barriendo pa fuera" onde fusiona rap, ska y funk afayando un soníu propiu, atractivu y reivindicativu col que tien grabaes collaboraciones como les de Maxi (Fe de ratas) con lletres enforma explícites lo mesmo n'asturianu qu'en castellán xenerando nel escenariu'l caldu perfeutu pa que l'espectador/a garre concencia, carrera y salga del conciertu coles bateríes bien cargaes d'argumentos pa reflexonar, lluchar y tresformar.

Ver:

www.myspace.com/galantrasona

- Da Robotz, nomes tres del que ta Xel Díaz, músicu uvieín que fai música lletrónica con milenta influencies y mui averáu al mundu del folk, participando en festivales de prestixu como'l LEV de Xixón que de xuru topa nel entornu de la Casa Sindical un espaciu perfeutu pa desplegar el so espectáculu que va muncho más alló del soníu pol soníu.

Ver:

www.myspace.com/darobotz

En Fai! queremos convidate a participar nesta xornada perimportante pa que la nuesa historia, esa que quieren tapecenos y que nun s’enseña nes escueles, nun se pierda. El 25 de mayu de 1808 el pueblu, con dos muyeres a la cabeza, obligó a la Xunta Xeneral a declaráse soberana, a crear un exércitu asturianu, una bandera col lema “Asturias nunca vencida” y a unviar embaxadores del gobiernu asturianu a Inglaterra.

L’espaciu y l’escenariu tan abiertos a la participación de tolos coleutivos y persones qu’asina lo quieran, pa festexar el nuesu día nacional.

El preciu del conciertu ye de 6€ anticipada y 8€ nel puestu d'entraes, pudiendo mercase anticipadamente nos siguientes sitios:

Xixón: C.S. Sestaferia, El Baruku

Uviéu: La Casa Posafuelles, L'Arcu la Vieya

Avilés: Llar d'Andecha

Mieres: L'Habana, L'Abellugu.

Llanera: El Ñeru.

¡PUXA'L 25 DE MAYU!
¡PUXA ASTURIES LLIBRE!

1808-2010: 202 años lluchando pola soberanía popular asturiana!!