Fai! defínese como una organización política que pretende articular un frente alternativu y popular d'aición y pensamientu ampliu na esquierda, los movimientos sociales y la defensa de la soberanía asturiana dende la independencia política, ufriendo asina una ferramienta útil de tresformación social y participación al pueblu asturianu.

¿Cuálu ye’l proyeutu de Fai!? ¿Ye necesaria una organización política, non venceyada a nengún partíu políticu n’Asturies? ¿Qué pue ufiertar al escenaríu políticu d’anguaño?

Fai!, como bien comentáis nel entamu, trabaya nún ámbitu políticu independiente, col enfotu d’aportar un espaciu de llucha paralelu al de los partíos políticos, que faiga por esparder unos valores concretos; ye por ello que creyíemos, de la qu’entamamos en mayu de 2008 la nuesa actividá pública, que nel casu de la esquierda soberanista había yá abondes organizaciones polítiques que se presentaben a les eleiciones pero ensin poseyer un texíu interasociativu que pudiere tender pontes ente eses mesmes organizaciones esistentes, que taben trabayando con muncha voluntá pero tamién con un escasu ésitu, del que nós tamién mos víemos damnificaos/es como parte d’esti movimientu.

Paeznos que yera y sigue siendo interesante pal entornu políticu nel que mos asitiamos que, dende la mayor humildá, collaboración y respetu pa col restu d’espacios cercanos ideolóxicamente falando, heba organizaciones non vinculaes direutamente na dinámica electoral, como llugares de participación de xente que nun confía o nun comparte anguaño les estratexes eleutorales esistentes, espardiendo los valores de la esquierda y la defensa de la soberanía notros nichos políticos y sociales a les que les organizaciones esistentes nun podíen llegar con facilidá pola so propia condición.

Fai! ye una organización política, mayoritariamente de mocedá, la mayor parte de los sos miembros nun entamu provienen de les mocedaes d’IAS. ¿Qué vos llevó a dar el pasu a esta nueva ferramienta política? ¿Cuáles son les vueses referencies a la hora d’echar a furrular el proyeutu políticu?

Nesti puntu prestaríanos esclariar dalgo importante, que ye que Fai!, como apuntáis, nun ye estrictamente una organización de mocedá, anque anguaño tea formada por xente mayoritariamente mozo, cosa que lleva davezu a la confusión a la xente que mos conoz.

No que cinca a la procedencia orgánica de la militancia, si bien ye cierto qu’hai una parte de la militancia de Fai! que procede d’otros proyeutos políticos, queremos dexar afitao que Fai! nin ye nin se siente corresponsable o heriede d’otros episodios pasaos de la hestoria de la esquierda soberanista asturiana. Anguaño les más de les compañeres y compañeros militantes entren p’aportar el so trabayu voluntariu dende la independencia política. Poro, nel intre nel que Fai! se presenta públicamente como plataforma, refuga esti tipu de dinámiques qu’afonden n’erros pasaos que nun faen otro que dexar a xente mui válido nel camín y desmoralizar al conxuntu del movimientu.

Ye por ello que precisamente la situación frentista na qu’entóncenes interpretamos que nos alcontrábemos puxaron pa que diéremos el pasu a plantegar una alternativa asociativa más adientro de la esquierda soberanista, non col envís de competir con otres yá esistentes sinón, como vos dicíemos enantes, pa texer una rede d’intercomunicación ente elles y agrupar a xente descontento col panorama que güei carecemos.

Otru tipu de razones que nos abultaben relevantes pa salir al escenariu políticu podríen ser delles más; como facer aportaciones ideolóxiques alternatives, el discutiniu sobro la estratexa política nos caberos tiempos...en definitiva, la rexeneración del discursu d’esti movimientu, afitando lo que mos paecía importante y sorrayando tamién los erros que podíen vinir cometiéndose nestos años.

Y en cuantes a les referencies, pue dicise que les distintes persones que conformen Fai! ufren una gran variedá d’ideoloxíes dientro de la esquierda y del asturianismu, onde nun ye raro que se comparta militancia, tamién, con organizaciones de tipu ecoloxista, estudiantil, cultural, movimientu llingüísticu…

Asturies ta gobernada por una coalición electoral supuestamente d’esquierdes. Les vueses crítiques al gobiernu d’anguaño toquen asuntos sociales, culturales y de calter territorial ¿Qué necesita Asturies y qué propón Fai! pa meyorar el futuru del nuesu país?

En primer llugar, a la hora de buscar culpables de la situación de desamparu na que s’atopa Asturies nun podemos evitar el siñalar a la "Federación Socialista Asturiana" como responsable principal d’esti escenariu, un partíu que de momentu sigui recibiendo l’apoyu d’una sociedá alienada poles redes clientelares y mafioses afitaes dende y enantes de la malnomada "transición democrática", depués de la muerte del dictador, pero cola continuación d’un réxime nel que camudaron mui poques coses. Anguaño, la coalición IU-BpA-LV nun ye más que’l convidáu de piedra cómpliz na farsa de la FSA, un teatru nel que los que se dicen “d’izquierdes o nacionalistes o ecoloxistes” traguen ensin complexos nin vergoña con una xestión qu’anecia na llaceria llaboral, nel xenocidiu identitariu y na estroza ambiental.

En segundu llugar, la problemática d’Asturies nun ye mui estremada de la d’otros munchos países del estáu, d’Europa o del mundu. Nuna realidá de capitalismu sangrín global, onde primen les ganancies pa unos pocos frente a los drechos de toes y toos, onde los qu’ostenten el poder siguen calteniendo la dictadura del eurodólar, la del FMI y les sos sucursales como la X.E, siguimos esclavizaes y reprimíes como persones y como pueblos. Y n’Asturies, amás, carecemos el xenocidiu identitariu del xeitu más vergoñosu: faciendo y obligando a esti pueblu a escaecer los sos vezos y la so llingua al traviés d’una aculturización qu’ensonsaña y conderga a la nuesa cultura milenaria a la marxinación y l’escaezu.

Con esti panorama, dende Fai! creyemos que’l primer pasu pa degolar esta realidá pasa pela autoconcenciación y visibilización social de la situación na que mos atopamos. Facer que la población seya consciente de la inxusticia d’esti sistema pa coles persones y pueblos ye’l primer pegoyu qu’hai que poner pa que la xente reaicione énte esti escenariu. Pero nun pueden ser too crítiques valeres, hai que plantegar soluciones y alternatives a eses problemátiques. Proponer ensin complexos veros cambeos acordies cola realidá asturiana y consecuentemente col compromisu ideolóxicu que mos asiste.

La reforma del Estatutu ta parada nel actual escenariu políticu, ¿qué tien d’afitase na viniente reforma del Estatutu d’Autonomía d’Asturies?¿ye posible la oficialidá de la llingua?

Bono, enantes de nada hai que dicir claramente que la reforma estatutaria ta parada porque los partíos parllamentarios nun tienen priesa nenguna por reformar un estatutu que-y dea una migayina más d’autogobiernu a Asturies, lo que ye sintomático nel contestu estatal onde toles naciones pruyen porque medren les sos competencies menos equí. Si por ellos fore, devolveríenles toes y tornaríen al modelu más provincialista del que tampoco tamos mui alloñaos.

Dicho esto, Fai! entiende qu’esta vía estatutaria nun puede solucionar en nengún casu los problemes d’Asturies pola so propia definición. Los estatutos d’autonomía son una de les pieces claves na conformación del estáu monárquicu español que llexitima la situación de cárcele pa los pueblos, polo que nun tenemos nengún enfotu nesa reforma, más alló de custiones puntuales, de tipu simbólicu y tácticu, como pudiere ser el casu de la oficialidá de la llingua asturiana y del gallego-asturianu nel so ámbitu.

No que cinca al conflictu llingüísticu non sólo ye una vergoña la non oficialidá de los nuesos derechos llingüísticos, situación irregular qu’habría facer tremar los cimientos de la so sagrada constitución d’amagüestu postfranquista, sinón que constitúi una de les grandes discriminaciones de los y les asturfalantes frente a otros y otres falantes de llingua propia de les naciones peninsulares, discriminación recoyida como tal na carta de derechos humanos de les sos Naciones Xuníes.

Con too y con ello, mentres nun consigamos que la xente castigue l’actitú de los partíos antiasturianos pa col nuesu idioma y seyamos a llevar les reivindicaciones masivamente a les cais y les instituciones nada nun mos va ser regalao, porque’l so miéu al espoxigue d’una alternativa que puxe pola identidá asturiana va facer siempre que sigan calteniendo estes postures llingüicides.

¿Interesa la llingua asturiana y la defensa de les señes d’identidá propies a la mocedá asturiano?

Nún contestu como l’actual, onde’l sistema fomenta la desmovilización, l’alienación coleutiva al traviés de los mass-media y l’apatía, hai qu’entamar diciendo que los espacios nos que se planteguen les visiones alternatives y crítiques nun son mui bayurosos. Sicasí, el bon facer del asturianismu cultural n’ámbetos como la música, la lliteratura, les artes etc amuesen que n’Asturies, los productos de mayor calidá tán fechos n’asturianu.

Agora tócanos a nós, a esti movimientu, rentabilizar y treslladar esi trabayu tan abegosu y desagradecíu en concencia política nacional, pa una mocedá qu’en munchos casos nun ye que nun quiera combatir la realidá, sinón que ta mediatizao y alleccionao na sumisión y na non protesta énte l’orde establecíu. Organizar la disidencia y valtar tabúes y muries establecíes de lo "políticamente correuto" ye’l primer pasu qu’hemos de dar pa qu’esa mocedá qu’acueye lo asturiano como propio pase a defendelo activamente.

La emigración de la mocedá asturiano, el paru, la falta de vivienda, ¿qué soluciones aporta Fai! a la mocedá asturiano y a los/es asturianos/es en xeneral?

Les soluciones a estes problemátiques, xunto a otres como la degradación y amenorgamientu de los servicios públicos tienen una culpa y una solución bien clares y son esportables a cualquier país del mundu, non sólo a Asturies. Son, evidentemente, consecuencia del sistema políticu nel que nos atopamos, que por muncho que mos lu quieran dulcificar y decir qu’agora ta en crisis, conlleva siempre desigualdá y esplotación, pola so propia definición. D’igual mena, les soluciones tan bien clares y definíes dende hai bien de tiempu: el borrón y cuenta nueva, el desaniciu d’un capitalismu qu’enxamás puede ser ameyoráu y que tien que ser sostituyíu por un modelu de xusticia social, participación, repartu de la riqueza y onde nun heba espaciu pa la especulación nin la esclavitú de persones y pueblos.

D’otra miente, dende los tiempos de les reconversiones, les prexubilaciones y les compres de sindicatos que neutralizaron los movimientos de reivindicación llaboral y sindical, la desapaición de les demandes y movilizaciones que’hasta’l momentu percanciaren pequeños llogros arrincaos de les zarpes del capital dio pasu a una pabana de la clas política qu’impidió dá-y a lo menos, un futuru económicu decente al país, que se caltién en crisis permanente dende hai décades.

¿Qué rellaciones tien Fai! con otros coleutivos político-sociales d’Asturies? ¿Y de fuera les nueses llendes?

En virtú de lo espuesto al entamu, Fai! considera prioritaries les rellaciones coles organizaciones de la esquierda asturiana. Asina, Fai! participa en munches plataformes y espacios comunes con bona parte de les organizaciones alternatives, polítiques, sociales, sindicales etc qu’operen nel país. Si bien ye verdá que la comunicación ye dalgo bien fluyío y continuo con organizaciones del entornu políticu, especialmente del más próximu, sí queremos afitar que munches vegaes estes son inda insuficientes, pero entendemos y agradecemos la bona disposición que dende cásique tolos ámbetos se tuvo siempre pa con nós esperando qu’estes vayan a más y meyor, como estratexa pa facer frente a les problemátiques d’esti país.

No que tien que ver coles organizaciones d’otros países, Fai! caltién una bona conexón coles organizaciones referenciales d’esquierda soberanista de cásique toles naciones y pueblos de la península (Aragón, Galiza, PPCC, EH, Andalusía, Castiella...). Collecha d’estes rellaciones ye’l bon intercambéu d’esperiencies, materiales y proyeutos bien interesantes qu’arriquecen y potencien los nuesos discursos, en xeneral mui asemeyaos anque en marcos xeopolíticos mui distintos.

L’Ensame República Asturiana (ERA), les critiques a la esquierda estatal nel aniversariu del Ochobre del 34, los conflictos sociales faen albidrar una "xunidá d’aición" ente les diferentes agrupaciones de mocedá d’Asturies. Amás son delles les voces nel asturianismu políticu que nagüen pola xuntanza de los diferentes actores políticos col enfotu n’algamar meyor resultaos electorales, ¿qué opina Fai! nesti asuntu? ¿ye posible alcuerdos ente les diferentes organizaciones de mocedá asturianes (Darréu, UNA-mocedá, Bloque de Mocedá Asturianista, Xuventu Asturianista, Sofitu, CMC,..), p’algamar oxetivos comunes?

Evidentemente, Fai! ye consciente y fondamente creyente de que namás dende la xuntura de la disidencia política al réxime del PSOE-IU/PP se pueden llograr trunfos riales que torguen les polítiques neocón-capitalistes y asturianófobes de los sucesivos gobiernos asturianos y de fechu esta organización y la so militancia, lleva participando dende l’entamu n’espacios onde s’axunten delles de les organizaciones a les que vos referíeis nes entrugues.

Sicasí, hai delles coses que rinchen col discursu que Fai! caltién hasta’l momentu nesa retafila de siegles. Por exemplu, Fai! entiende los procesos políticos d’averamientu nesti contestu namás dende una óptica d’esquierdes. D’esti xeitu, quedaríen al marxe organizaciones que defenden y tienen pa bien un modelu como’l capitalismu, que pa nós ye direutamente responsable tamién de los procesos de globalización non sólo económica sinon tamién cultural que, como dicíemos, desanicien la cultura popular asturiana. Asina, y teniendo pa nós que l’espectru asturianista ye mui mayoritariamente esquierdista, nun creyemos qu’heba que cayer nes tentaciones de les postures de dereches, por "mui asturianistes" que se digan, posicionamientos nun se correspuenden cola defensa d’Asturies que nós proponemos y na que creyemos, nin na estaya más cultural o identitaria nin, de cuntáu, nel tarrén económicu y ambiental.

Pelo demás, y anque hai organizaciones nomaes de les qu’inda nun conocemos más posicionamientu nin noticia más alló de la so presentación pública y la so postura favorable, pescudamos, al pautu de gobiernu ente PSOE y IU-BpA-LV, podemos dicir que la sintonía ye bona y constante con organizaciones como Darréu, UNA-Mocedá, Sofitu o los CMC, coles que se coincide de contino en movilizaciones y plataformes, lo mesmo con elles como coles estayes "senior" a les que tan vinculaes en cada casu, polo que l’ensanchamientu d’eses rellaciones a otros munchos ámbetos sabemos que ye posible y sedría mui granible.

Los conceyos son la base de la cadarma d’Asturies, ¿cuálu ye’l vuesu llabor nel tarrén municipal?

Nestos dos años escasos d’actividá, Fai! fizo por trabayar y estabilizar agrupaciones nos dos conceyos más importantes del país, Uviéu y Xixón, onde s’axuntaba por razones llaborales, d’estudios y de proximidá la mayor parte de la militancia. Una vegada puestos esos pegoyos ta claro qu’ensin una política nos conceyos qu’aporte soluciones a los problemes más cercanos, nun hai éxitu posible. Amás, los procesos de xunidá de la esquierda asturiana nesos ámbetos pueden ser inda más necesarios y fáciles de dase, poles propies llendes nes que se desendolca la política nos conceyos, l’averamientu más directu y cómpliz al propiu pueblu, etc. Anguaño Fai! ta promoviendo l’autoorganización d’asamblées llocales en conceyos onde hai militancia disperso pa que puean facer el so llabor y trabayu en comuña xunto a otres persones y coleutivos del so mesmu entornu.

Col actual escenariu políticu, ¿ye posible unos alcuerdos de mínimos que finen cola xuntanza de los diferentes partíos políticos nuna futura plataforma electoral asturiana nel 2011?. Desplicái los motivos.

Pa nós, y depués de tolo espuesto equí, ta claro que sí que debiere ser posible. Hai que facer por trabayar nuna estratexa d’espacios comunes, onde s’alcuerden unos llínies de trabayu ente toles organizaciones qu’a nós mos abulta que podíen ser bien asumibles por toles sensibilidaes de la esquierda asturiana. La denuncia de los causantes de la crisis y la busca d’una alternativa a esti modelu económicu, el republicanismu, la refuga al modelu d’estáu español y la defensa de la identidá asturiana hasta les máximes consecuencies, xunto cola revolución verde, pueden ser l’entamu pa un alderique prestosu, nel que nun puen faltar los movimientos sociales. El 27 de payares Fai! cellebró la so II Asamblea Xeneral Estraordinaria na que s’analizaron estes custiones (como munches otres de tipu organizativu) p’afrontar esti 2010, y camentamos que nos próximos meses esti tema siguirá siendo recurrente nel sen de la organización.

Esperemos que’l futuru que tamos por construyir dea soluciones y fine coles problemátiques qu’anguaño carecemos. Y que sigamos cuntando col sofitu de los medios de contrainformación asturianos, como nel casu d’Aruelu.com, pa dar cobertura a les nueses actividaes y demandes.

Munches gracies pol vuesu enfotu pa con nós.

La entrevista pue vese tamién equí.