La iniciativa tien como enfotu l'averamientu dende la base a les problemátiques de los conceyos, faciendo por ufrir una visión alternativa dende l'asamblearismu y la esquierda soberanista a munchos de los problemes que carecen fasteres como Llanera, de tradición rural, pero avocaes anguaño a tener núcleos importantes de tipu "ciudá dormitoriu", que ruempen los vínculos cola vida tradicional, mesmo nes rellaciones col entornu, como llaborales, como de texíu social.

Dende Fai! queremos convocar a tola xente con inquietúes asturianistes, ecoloxistes, sociales, culturales...a participar na asamblea y aportar la so visión sobre les problemátiques de les qu'adolez Llanera y la so redolada. P'abrir el debate proyectaráse un vidiu al rodiu de les problemátiques que xeneren infraestructures como'l Tren d'Alta Velocidá (TAV) y la resquiebra ambiental y social que provoca'l superdesarrollismu que pa unos supón "avance" y pa otros munchos y munches, espropiación, estroza ambiental y modelos sociales d'inxusticia social.

Pa finar, Fai! fadrá un mural conmemorativu de l'actividá nel mesmu conceyu.